أحمد الأحمر يكتب| المركز الرابع مستحق.. وليه حسام حسن ؟

بقلم – أحمد الأحمر – رئيس تحرير كاس نيوز

غضب في الشارع المصري لحصول المنتخب على المركز الرابع في نهائيات كأس الأمم الأفريقية المقامة في المغرب والكل كان عايز منتخبنا يفوز باللقب ويكون بطل أفريقيا ويحقق اللقب الثامن في تاريخ البطولة.

ده طبيعي وكل ال24 منتخب اللي شارك كان عنده نفس الطموح والأمال في الحصول على اللقب ولكن الواقع غير كده والحقيقة صعبه والمركز الرابع لمنتخبنا مستحق وفي فوارق كبيرة جدا جدا.

علشان نكون واقعيين منتخبنا وهو مسافر كان كل الكلام إنه صعب يتخطى الدور الأول وصعب إنه يوصل لدور الثمانية ولو وصل ده إنجاز واتحاد الكرة نفسه وهو بيتعاقد مع حسام حسن ما طلبش منه إنه يفوز باللقب ده طلب منه إنه يوصل الدور قبل النهائي يعني كان أقصى طموحنا وقت التعاقد معاه الوصول للدور قبل النهائي.

وبعد تحقيق المركز الرابع الدنيا قامت وهجوم إزاي نحصل على المركز الرابع بس وليه مش اللقب رغم إن ده المستوى الحقيقي ولازم نكون واقعيين منتخبنا فيه أخطاء كتير ومتكرره مع أكتر من مدير فني مش حسام حسن بس وعندنا أزمة وفارق في المستوى بين لاعبيتنا والمنتخبات المنافسة في أفريقيا.

وده مش تقليل من اللاعب المصري ولكن ده وضعنا الحالي ولازم نصلح أخطائنا ونشتغل عليها كويس ونطور الكورة بجد ونتصدى للي بيحصل في الدوري المصري والأسعار المبالغ فيها لدرجة إن اللاعب بقا بيقول اروح أوروبا وأبهدهل نفسي ليه ما الفلوس في مصر أكتر من بره لازم نوجه اللاعيبه للإحتراف ولازم نحط سقف أعلى لعقود اللاعيبه ونبطل نطبطب وندلع فيهم ونحسسهم إنهم الخارقين.

وبالنسبة لحسام حسن الراجل نفذ المطلوب منه وعلشان تمشيه دلوقتي وقبل كاس العالم ب6 شهور ده جنان وغلط وحتى لو عنده أخطاء وحتى لو في إعتراضات واضحه اتحاد الكرة يقعد معاه ويصلحها ولكن رحيله دلوقتي قرار غلط ولازم يستمر علشان يكمل في كاس العالم وهو اللي يحاسب في النهاية على مشواره لان اي مدرب تاني في التوقيت ده ها يقول المدة قليله ومخدش فرصة علشان يتعرف على اللاعيبه والمحصله ها تكون هيا هيا.

تجربة حسام حسن يتحاسب عليها بعد كاس العالم خلينا نكون واقعيين العيب مش في أخطاء حسام حسن بس لا العيب في المنظومة كلها اللي عايزه تتحاسب.

المركز الرابع في كأس الأمم كان أكبر من طموحات الجميع قبل السفر للبطولة وإستمرار حسام حسن أمر واقع؟