بعد مشوار ١٨ سنة .. ياسمين حمدي تعلن اعتزال الكاراتيه نهائيا
أعلنت ياسمين حمدي لاعبة منتخب الكاراتيه اعتزالها اللعب نهائيا وذلك بعد عدم نجاحها في خطف تذكرة التأهل لأولمبياد طوكيو.
وكانت ياسمين حمدي قد خسرت في التصفيات العالمية المؤهلة لأولمبياد طوكيو قبل أيام لتفقد فرصة التأهل .
وقال ياسمين عبر حسابها على فيس بوك
أحب أشكر كل واحد وقف جنبى فى خلال ال ١٨ سنة اللى عشتهم فى الكاراتية إذا كان مدرب او لاعب كل واحد ساعدنى و وقف جنبى ولو بكلمة و كل واحد أذانى نفسياً او بكلمه قالها عليا برضه أحب اشكرهم علشان كانوا دايماً الدافع انى ارد عليهم فى الملعب .
المشوار كان بالنسبالى صعب عملت فيه أقصى ما عندى.. الفترة اللى فاتت تعبت جامد و وقعت سنتين تقريباً كنت بعيد بشكل نهائى فى نظر كل الناس و كانت إرادة ربنا إنى أرجع و بقوة و بشكل يرضينى و يخلينى فخورة بإنى قدرت أرجع لنفسى و ربنا عوضنى عن الفترة ديه اللى هو وحده يعلم انا كنت عامله إزاى و بتعب فيها ازاى و أقف على رجلى من تانى أه اكيد كان نفسى أنهى المشوار بالحلم اللى اى رياضى بيحلم بيه بس إرادة ربنا فوق كل شيئ عملت أقصى ما عندى و أخذت بكل الأسباب و سبتها لربنا و الحمدلله راضية بالنتيجة و واثقة ان ربنا هيعوضنى عنها خير .
وواصلت : اليوم قررت اعتزالى اللعب نهائياً و أتمنى من الله إنى فى يوم مكنش اذيت حد من غير ما أقصد و أتمنى ان دايماً اللى يفتكرني او يجيب سيرتى يفتكرنى بالحلو وتسامحونى فى الوحش و أتمنى إنى فى خلال السنين اللى فاتت أكون سبت أثر كويس على اى حد اتعامل معايا يفتكرنى بيه .
