تأكيدًا لـ “كأس نيوز “.. أحمد صلاح لاعب الريشة الطائرة يعلن اعتزاله رسميًا 

أعلن أحمد صلاح لاعب المنتخب المصري للريشة الطائرة، اعتزاله الدولي والمحلي رسميًا بعد تواجده في الملاعب لأكثر من 24 عام.

ونشر أحمد صلاح عبر صفحته الرسمية على موقع التواصل الاجتماعي “فيسبوك“ قائلًا: “بعد أكثر من 24 سنة، قررت الاعتزال رسمياً، بكرة إن شاء الله في بطولة الجمهورية للزوجي و الزوجي المختلط هيكون آخر ظهور ليا في الملعب كلاعب“.

وأضاف: “أحب أشكر كل من ساهم في تدريبي وتطويري من الجانب الفني والأخلاقي، أحب أشكر أحلى لاعيبة وأصحاب وأخوات عيشت معاهم أكتر ما عيشت في بيتي ما بين معسكرات وسفر وتمرين واللي هيفضلوا في حياتي على طول“.

وتابع: “اتعلمت كتير قوي خلال كل السنين دي، اتعلمت الانضباط والجدية وروح المنافسة، اتعلمت روح الجماعة، اتعلمت إن الخسارة مش نهاية العالم وإن المكسب محتاج تعب ومجهود“.

وواصل: “شوفت أنضف الناس وبرضو شوفت أبشع الناس، الناس اللي بتتمنى الاذى لغيرها عشان ياخدوا مكانهم، الناس اللي بتضحك في وشك و عماله تطعن في ظهرك، اتعاملت مع أنظف المدربين اللي ماشفتش منهم غير كل خير واحترام، وبرضه اتعاملت مع مدربين من أبشع ما يكون عندهم القدره على الاذية من باب السلطة“.

واختتم: “في النهايه هو دا المجال.، فيه الحلو وفي الوحش، 

أتمنى أكون أتممت رسالتي في أحسن صورة وأكون حد الناس هتفتكره بالخير، وأخيراً أحب أشكر أهلى اللي ساندوني من ساعة ما بدأت العب وكانوا أول داعميني لحد آخر مباراة وأحب أشكر زوجتي اللي استحملت غيابي الدائم بسبب شغلي وتمريني وماتشاتي“.