شروق وفا تعلن اعتزال اللعب باسم منتخب الشطرنج وتكشف أسباب التحول لتمثيل إيرلندا
أعلنت شروق وفا لاعبة المنتخب الوطني للشطرنج اعتزالها اللعب باسم مصر وبدء خطواتها لتمثيل منتخب إيرلندا خلال الفترة المقبلة، بعدما حققت أكثر من 20 ميدالية ذهبية على مدار 15 عامًا من المشاركة الدولية.
ونشرت شروق عبر صفحتها الرسمية على موقع التواصل الاجتماعي “فيسبوك” بيانًا مطولًا قالت فيه:
“الناس القريبين مني كلهم عارفين ان هبطل العب شطرنج بإسم مصر وبدأت خطوات تغيير الاتحاد لأيرلندا، طبعا بعد تحقيق أكتر من 20 ميدالية ذهبية للبلد على مدار 15 سنة، ومكنتش ناوية اقول الأسباب في العلن بس الاتحاد المصري للشطرنج مصمم في الانحلال وقلة الأدب فانا هنزلها”.
وأضافت: “منزلين خمسين مقال عشان يقولوا مختاروش حامد لبطولة افريقيا تحت ٢٠ عشان مستواه قل بجد؟ هو فيه اتحاد محترم ينزل مقال زي ده عن لاعب محققله بطولات المفروض يكون بيشجعه؟ والبطولة اللي قايلينها كمثال اللي هي العرب في المغرب هما مبلغين ان حامد مش هيسافر من قبلها أصلًا وهو فارق في الريت عن زمايله ساعتها، وحامد طلع الرابع تحت 20 وديفيد جورج سمير تحت 18 مش نفس البطولة، وديفد واخد منها IM مش محتاج اللقب ولا حاجة واحنا سكتنا ومكتنباش حاجة بس بيكذبوا عااادي”.
وتابعت: “وده طبعًا حصل بعد المهزلة بتاعة كاس العالم سيدات اللي نائب رئيس الاتحاد الأستاذ جورج سمير رفض يطلعلنا قرار وزاري على اساس ان فيها جوايز مالية فا عادي اطلعوا على حسابكوا، ووقفنا في المطار مكناش هنعرف نسافر عشان جورجيا محتاجة تصريح امني او قرار وزاري ومسافرناش الا لما غيرنا التذكرة ع السعودية”.
وواصلت: “وقبلها بطولة افريقيا (انا اللاعبة الوحيدة اللي خدتها 5 مرات) مدير البطولة كريم وجيه كل جولة كانت بتتأخر من ربع لتلت ساعة على ما ضيوف يجوا يعملوا النقلة الافتتاحية، وفي يوم اتأخرنا عشان باباه يتصور الصورة دي، واما في يوم بقى حصل حادثة في الطريق وكنا 3 لاعبين منتخب هنخسر بالانسحاب بلغناه ورفض يأجل الجولة وسبحان الله اليوم الوحيد اللي يبدأ في معاده وكان بيأجلها عشان لاعبين تانيين عادي، والبطولة كانت هتضيع مني بسبب كده أساساً عشان وصلنا قبل الانسحاب بدقيقتين بس عااادي المهم هو وأهله يتصوروا في الحفلة”.
وقالت أيضًا: “وقبلها بطولة الزون في نيجيريا اللي بتأهل لكاس العالم والGrand Swiss واتأهلتلها كأعلى تصنيف في القارة، نائب رئيس الاتحاد وعدني بتغطية التكاليف ولما تعبت هناك وجالي تيفويد ومتوفقتش طبعا قالي خلاص مانتي مجبتيش مركز هنكلم الوزارة نقولهم ايه ومرجعش أي تكاليف”.
وأضافت: “واتأهلنا بعد الأوليمبياد لكاس العالم قارات اللي مفيش غير 10 دول في العالم بتلعبه والاتحاد رفض يطلعنا برده عشان ميدفعش 1000 يورو اشتراك. ولا الأوليمبياد نفسها أصلًا اللي من 15 سنة بيطلع معانا اداريين يضرونا اكتر ما بينفعونا (دي عايزة بوست لوحدها والله)، وكل ده وعمري ما كتبت حاجة وكنا بنحاول نتفاهم معاهم وديًا بالكلام بس من غير أي فايدة لحد ما خدت القرار ان مش هلعب مع المنتخب تاني، بس خلاص فاض الكيل”.
وختمت شروق وفا: “المنظومة أساسا غلط عشان لو منصب مفيهوش مرتب فا مفيش حد اكيد فاضي يتطوع، ومش هيدخل فيه الا لو بيطلع منه مصالح، بس مستوى الانحطاط الحالي غير مسبوق ولا يشرفني ان امثل مصر مع وجود الاتحاد الحالي، وبالتوفيق”.
