ميار شريف تعسكر في إسبانيا.. وتوجه رسالة للمصريين
توجهت لاعبة التنس المصرية ميار شريف لاعبة المنتخب الوطني والنادي الاهلي إلى إسبانيا للدخول في معسكر مغلق إستعدادًا للبطولات المقبلة.
ووجهت ميار رسالة شكر وعرفان لكل من ساعدها في الفترة الأخيرة وللمصريين عمومًا من خلال ما كتبته على صفحتها علي موقع التواصل الاجتماعي فيسبوك كالتالي :
“تعبت كتير في مشواري القصير ولسة اللي جاي أكتر، لعبت في الدور الرئيسي في رولان جاروس لأول مرة في تاريخ التنس المصري، قررت أنزل مصر أحتفل مع كل المصريين بعد المشاركة اللي بعتبرها مجرد بداية، استقبال غير عادي، فرحة من القلب، ناس طيبين، فريق عمل فوق العادة، تغطية أعلامية راقية، دعم من الراعي فوق المتوقع، استقبال رسمي حكومي، فرص كبيرة من مجتمع الأعمال، اجازة سريعة في أحلي الاماكن في مصر، الناس فجأة بقت بتتصور معايا وانا ماشية في كل حتة.
تابعت ميار : ” نصيحة واحدة؛ مهم جدا ان الواحد يصدق في نفسة ويكون عندة “عقلية الفوز”. هفكر نفسي دايما بحاجة واحدة؛ دي مجرد البداية. أعاهد الناس بحاجة واحدة؛ هعمل كل اللي اقدر علية أني اتصرف صح، بكل الاحترام لنفسي وللجميع، عشان اكون قدوة للاجيال، وأكون قد اسم بلدي اللي اتكتبلي بكل الفخر أني اشيله في كل مكان.
بحمد ربنا علي كل حاجة كويسة حصلتلي الفترة الأخيرة .. أحلي البدايات. بحب بلدي، أهلي وفريق عملي، وبشكر كل واحد وقف جنبي من كل قلبي.
مسافرة معسكري التدريبي في أسپانيا، وهشوفكوا الشهر الجاي علي خير
تحيا مصر وأهلها الطيبين “.
