أحمد الأحمر يكتب|بيان السلة..” إدانة وغسيل يد .. وليس بطولة “

بقلم- أحمد الأحمر

فوجئت خلال الساعات الماضية ببيان قوي من الاتحاد المصري لكرة السلة ملخصه تهديد أي لاعب في حالة التهرب من عدم تمثيل منتخب مصر بالإيقاف والعقوبات المالية والتصعيد بالاتحاد الدولي وهذا البيان في ظاهره غسيل إيد فقط للي جاي وليس بطولة أو موقف يحتسب لمجلس إدارة اتحاد كرة السلة.

البيان الذي صدر من اتحاد كرة السلة ده بداية غسيل الإيد من ظاهره بيواجها الاتحاد وهو هروب بعض اللاعبين ورفض تمثيل المنتخبات والاتحاد بيقول بشكل غير معلن انا مش عارف أعمل حاجه وها اتبع الاجراءات القانونية ومحدش يحاسبني.

بكل صراحة ووضح ومن غير لف ودوران هو ده ملخص بيان الاتحاد اللي بيعتبر إدانه لمجلس الإدارة مش بطولة خالص لأن دورك كا اتحاد هو مواجهة ده بكل الطرق ودورك كاتحاد تحافظ على اللاعيبه وتعرف المشكلة فين وتتصدى ليها وتواجهها في الغرف المغلقه.

اتحاد كرة السلة عنده مشكلة كبيرة واختار الحل السهل وهو اللي مش عايز يمثل منتخب مصر نوقفه ونشتكيه ومالناش دعوة وكان المفروض إن لو ده حصل مع مجموعة لاعبين يحاول معاهم ويحل مشاكلهم ولو فشل يعلن الاسماء أمام الراي العام لان ده أول مكرة يحصل في كرة السلة البيان اللي صدر ده وأول مرة نشوفه في اي اتحاد مصري.

كنت منتظر من اتحاد السلة يسمع كلة معالي وزير الشباب والرياضة الدكتور أشرف صبحي في نهائي بطولة العالم للناشئين والناشئات للاسكواش واللي قال فيها “اللي مش عايز مصر مصر عايزاه وها نحاول بكل الطرق نحافظ على ولادنا ولا مال الدنيا يساوي قيمة علم مصر”.

دي رسالة يا اتحاد السلة انك تشتغل وتتمسك بأي حد وتواجه كل المغريات بكل الطرق وتحل مش تعمل بيان تغسل إيدك من اللي جاي ، ولو كل اتحاد عمل زي اتحاد السلة وقال وهدد من غير ما يعمل حاجه كانت الدنيا خربت.

لازم اتحاد السلة يراجع نفسه ولازم اتحاد السلة يعرف انه ها يتحمل المسئولية في حالة رفض اي لاعب الانضمام لمنتخب مصر سواء لاعب محلي أو محترف ولازم يعرف ان البيان اللي اصدره مش ها يعفيه من المسئولية أو كده خلاص غسل ايه الموضوع اكبر من بيان تهديد ده إسم مصر وولاد مصر حتى لو إبنك اتلعب في دماغه من حد بره لازم تحتوه وتمسك فيه وتحاول تحل ليه مش تساعد في طرده وتقول ها اقدم ورقه فيها ايقاف وعقوبة مالية ما ايقافك المحلي وعقوبتك المحلية مش ها تفرق معاه لانه ساعته ها يكون في مكان تاني ومالكش سلطه عليه خالص وعقوباتك اللي بتهدد بيها مالهاش لازمه.

كنت أتمنى التعامل مع الأزمة يكون على قدر المسئولية ونفهم كويس رسالة الدكتور أشرف صبحي اللي مش عايز مصر احنا عايزينه رسالة كبيرة ومعناها أكبر أننا ها نقاتل على ولادنا قدام أي مغريات وأي محاولات مش ها نسيبهم خالص ودي اللي المفروض الكل يعمله مش تصرف اتحاد السلة اللي مالوش مبرر غير غسيل ايد بدري اوي