محمد علاء لوكا يعلن اعتزاله كرة اليد

أعلن محمد علاء لوكا لاعب كرة اليد، اليوم الثلاثاء، اعتزاله اللعب بعد مسيرة حافلة سواء مع منتخب مصر أو مع نادي الزمالك ومؤخرًا مع نادي أهلي طرابلس الليبي.

وخاض محمد علاء لوكا الموسم الماضي رفقة ناديه أهلي طرابلس الليبي كما يشغل منصب نائب رئيس لجنة اللاعبين حاليًا باللجنة الأولمبية المصرية.

ودامت مسيرة محمد علاء لوكا مع الزمالك لسبع سنوات بين عامي 2017 و2024 قبل أن يرحل عن صفوف الفريق في صيف 2024.

ونشر محمد علاء لوكا صورًا له من مسيرته مع كرة اليد وعلق عليها:

“دايما كنت متخيل إن اللحظة دي هتبقي مليانة كلام .. وإن اليوم ده هقدر أوصف كل اللي جوايا بسهولة. يمكن من أصعب القرارات في حياة أي لاعب هي لحظة الإعتزال، مش علشان اللعب بس لكن علشان الخوف من المجهول، إنك هتصحي يوم وميبقاش عندك نفس الروتين، الإحساس والحياة اللي كنت عايشها من سنين. وانا بكتب البوست ده الحمدلله حاسس إني مرتاح و فخور بكل لحظ عشتها داخل الملعب. بكل بطولة، بكل خسارة علمتني، بكل مرة وقعت وقومت بعدها أقوي، حتي بكل إصابة الواحد اتعرضلها وقدر يعديها. الرياضة ادتني أكتر بكتير من مجرد لعبة ادتني شخصية، ناس، ذكريات، ودروس هتفضل معايا طول العمر. ولأول مرة من سنين يكون عندي فرصة أدي وقت أكتر للحياة اللي كنت بأجلها، لعيلتي وأصحابي. طول السنين اللي فاتت يمكن أنا كنت اللي واقف في الصورة، إنما هما اللي كانوا واقفين ورا الصورة، هما اللي شافوا التعب قبل النجاح، وشاركوا كل لحظة حلوة وكل لحظة صعبة،واستحملوا ضغوط وغياب وتضحيات كتير علشان أكمل طريقي، علشان كدا أقدر أقول البوست ده حقهم عليا قبل أي حد.
شكرا لأمي وأبويا، شكرا لأخواتي لأنهم أول ناس آمنوا بيا ووقفوا جنبي من أول يوم، اتحملوا معايا تعب التمرين والدراسة وكانوا دايما سند في كل خطوة، ولو وصلت لأي حاجة فحياتي او في الرياضة، فبعد فضل ربنا ليهم فضل كبير في كل اللي وصلت له.
شكرا لمراتي.. اللي يمكن تكون أكتر شخص استحمل الرحلة دي كلها، استحملت سفر وغياب وضغوط ومشاكل كتير، هي اللي كانت دايما بتسد غيابي من غير متحسسني انها مضايقة، بالعكس كانت دايما السند الحقيقي، وواقفة في ضهري.
شكرا لأولادي.. وجودكم في حياتي كان دايما أكبر دافع ليا وأتمني أكون مصدر فخر ليكم زي ما أنتم مصدر سعادة و فخر ليا كل يوم.
وبشكر كل مدرب اشتغلت معاه، وكل لاعب شاركني الملعب أو أوضة اللبس.رحلة طويلة من التعب والحلم.
أكيد اتعلمت من كل شخص قابلته في الرحلة دي، وكل واحد فيهم ساب جوايا حاجة وأضافلي بشكل أو بآخر. وأكيد هييجي وقت أقدر أتكلم فيه عن كل مرحلة، وكل الناس اللي كان ليها تأثير حقيقي في حياتي.وأكيد هيجي وقت أقدر أتكلم فيه عن كل مرحلة، لأن الرحلة دي عمرها ما كانت رحلة فرد لوحده..والأهم إن الشغف اللي جوايا للعبه عمره ما هيختفي.هو بس هيكمل بشكل مختلف.
الحمد لله علي كل لحظة..
واليوم أعلن اعتزالي لعب كرة اليد”.